Matthew 2

1Bayanda aka haifi Yesu a Baitalami ta kasar Yahudiya, a zamanin sarki Hirudus, sai ga wadansu masana daga gabas suka zo Urushalima, suna cewa, 2‘’Ina wanda aka haifa sarkin Yahudawa? Mun ga tauraronsa a gabas mun kuma zo mu yi masa sujada.‘’ 3Da sarki Hirudus ya ji haka, sai ya damu kwarai, haka kuma dukan mutanen Urushalima.

4Hirudus ya tara dukan manyan firistoci da marubuta na jama’a, ya tambaye su, “Ina za a haifi Almasihun?” 5Suka ce masa, ‘’A Baitalami ne ta kasar Yahudiya, domin haka annabin ya rubuta, 6‘Ke kuma, Baitalami, ta kasar Yahudiya, ba ke ce mafi kankanta ba a cikin shugabanin Yahudiya, domin daga cikin ki mai mulki zai fito wanda zai zama makiyayin jama’a ta Isra‘ila.‘‘’

7Sai Hirudus ya kira masanan a asirce ya tambaye su aininhin lokacin da tauraron ya bayyana. 8Ya aike su Baitalami, ya ce, ‘’Ku je ku binciko mani dan yaron da kyau. Idan kun same shi, ku kawo mani labari, don ni ma in je in yi masa sujada.”

9Bayan sun ji maganar sarkin, sai suka yi tafiyar su, ga shi kuwa, tauraron da suka gani a gabas yana tafe a gaban su, har ya zo ya tsaya bisa inda dan yaron nan yake. 10Da suka ga tauraron, sai suka yi matukar farin ciki.

11Sai suka shiga gidan, suka ga dan yaron tare da mahaifiyarsa Maryamu. Suka rusuna gabansa suka yi masa sujada. Sa’an nan suka kwance kayansu, suka mika masa kyautar su ta zinariya da lubban, da mur. 12Allah kuma ya gargade su a mafarki kada su koma wurin Hirudus, sai suka koma kasarsu ta wata hanya dabam.

13Bayan sun tashi, sai ga wani mala’ikan Ubangiji ya bayyana ga Yusufu a mafarki, ya ce, ‘’Tashi, ka dauki dan yaron da mahaifiyarsa, ka gudu zuwa kasar Masar, ka zauna a can sai na fada maka, don Hirudus yana shirin binciko dan yaron ya hallaka shi.” 14A wannan dare fa Yusufu ya tashi ya dauki dan yaron da mahafiyarsa ya tafi Masar. 15Ya zauna a can har mutuwar Hirudus. Wannan kuwa domin a cika abin da Ubangiji ya fada ne ta bakin annabin, ‘’Daga Masar na kirawo Da na.‘’

16Da Hirudus ya ga masanan nan sun shashantar da shi, sai ya hasala kwarai, ya aika a karkashe dukan ‘yan yara maza da suke Baitalami da kewayenta, daga masu shekara biyu zuwa kasa, gwargwadon lokacin da ya tabbatar a gun masanan.

17A lokacin ne aka cika fadar Annabi Irmiya, 18‘’An ji wata murya a Rama, tana kuka da bakin ciki mai zafi, Rahila ce take kuka saboda ‘ya’yanta, kuma ta ki ta ta’azantu, domin ba su.

19Sa’adda Hirudus ya mutu, sai ga mala’ikan Ubangiji ya bayyana ga Yusufu a mafarki a Masar ya ce, 20‘’Tashi ka dauki dan yaron da mahaifiyarsa, ka tafi kasar Isra’ila, domin masu neman ran dan yaron sun mutu.‘’ 21Yusufu ya tashi, ya dauki dan yaron da mahaifiyarsa, ya zo kasar Isra’ila.

22Amma da ya ji Arkilayus ya gaji mahaifinsa Hirudus, yana mulkin kasar Yahudiya, sai ya ji tsoron isa can. Bayan da Allah ya yi masa gargadi a mafarki, sai ya ratse zuwa kasar Galili sai ya je ya zauna a wani gari da ake kira Nazarat. Wannan ya cika abin da aka fada ta bakin annabawa, cewa, za a kira shi Banazare.

23